Pamilya sa Germany, world record holder dahil sa dami ng Christmas tree sa bahay

Hawak ng isang pamilya sa Germany ang world record sa pagkakaroon ng 605 Christmas trees na fully decorated sa loob ng kanilang bahay.

Sa ulat ng GMA News Unang Balita nitong Huwebes, ipinakita na bubungad na kaagad ang naggagandahang Christmas trees pagbukas pa lang ng pintuan ng bahay ng pamilya Jeromin.

Puno ng Christmas tree ang kaloob-looban ng bahay na mayroong 120,000 ornaments, 50,000 Christmas lights at libu-libong Christmas figurines.

Kaya naman ibinigay sa Jeromin family ang world record sa pagkakaroon ng pinaka-maraming decorated Christmas trees in one place, na kinumpirma ng Record Institute for Germany (RID).

Hawak din ng pamilya ang naturang titulo noong 2017 hanggang 2021 at 2023.– FRJ, GMA Integrated News