Nasawi ang isang lalaking “nangangalakal” ng basura matapos siyang mahulog mula sa isang truck ng basura na kaniyang sinampahan, at nang bumagsak, nasagasaan ng isang dumaang truck sa Maynila.
Sa ulat ng GTV Balitanghali nitong Lunes, makikita sa CCTV footage sa bahagi ng Barangay 105 sa Road 10 o Mel Lopez Boulevard, na nakasampa sa gilid ng truck ng basura ang biktima.
Sa hindi malamang dahilan, nahulog ang lalaki at nasakto naman na may dumaan na trailer truck at doon na nagulungan ang biktima.
Samantala, labis naman ang pighati ng asawa ng biktima na nasaksihan umano ang sinapit ng kaniyang kabiyak.
Ang driver ng truck na nakasagasa, hindi umano tumigil kaya pinaghahanap na ngayon.
Base sa obserbasyon ng barangay, tila aksidente ang nangyari sa biktima pero hindi raw dapat tumakas at tinakbuhan ng nakadisgrasyang driver ng truck ang lalaki. — FRJ, GMA Integrated News
Be the first to comment